Trebeshina

VLORË – Familjarë të tetë personave të ndaluar lidhur me vdekjen e Aristidh Gumës më 12 gusht kërkojnë që të vihet në vend drejtësia. Disa prej tyre në media e të tjerë nën zë kërkojnë që ngjarja për të cilën akuzohen të shihet pa ndërhyrjen e rrymave të ndryshme politike, të cilat e çuan këtë “aksident” në një rang ndërkombëtar si vrasje.

Halo Muka, babai i të akuzuarit kryesor të kësaj ngjarjeje, Ilir Mukës, ka kërkuar drejtësi ndërkohë që i është drejtuar Bollanos që të mos shfrytëzojë fatkeqësinë e ndodhur për qëllimet e veta politike.

Duke deklaruar se në këtë çështje janë përfshirë shqiptarë dhe jo grekë, si dhe duke theksuar se viktima ishte një grekfolës dhe shqiptar, ai u është drejtuar instancave që ta shohin ngjarjen si një fatkeqësi. Për mediat kanë folur edhe dy të liruarit përkundrejt garancisë pasurore, Dijon Bushi dhe Fabion Jahaj, të cilët janë shprehur se ata ishin nisur me pushime për në Jalë dhe nuk kishin asnjë lidhje me aksidentin e ndodhur.

Djemtë e rinj kanë këmbëngulur se viktimën nuk e njihnin dhe se nuk i dinin as emrin, teksa kanë theksuar se në momentin që janë ndaluar nga policia, kanë qenë të rrethuar nga disa banorë të Himarës, të cilët i konsideronin si vrasës pavarësisht aksidentit të ndodhur.

Një deklaratë e tillë e djemve është mbështetur nën zë edhe nga punonjës të policisë së Vlorës, të cilët kanë marrë pjesë në ndalimin e të rinjve, duke u shprehur se nëse vetë policia nuk do t’i kishte ndaluar djemtë, ata do ta kishin pësuar keq nga banorët e acaruar për ngjarjen.

Ndërkohë, babai i Andi Kotorrit i telefonuar u shpreh vetëm se gjithçka ia linte në dorë drejtësisë. Të afërm të tjerë të personave që ndodhen në qelitë e paraburgimit shprehen se janë të bindur se pas-ngjarja është e sajuar nga qarqet greke, ndërkohë që akuzojnë edhe qeverinë për mosndërhyrjen e saj në ngjarjet e mëpasme.

Të afërm të djemve shprehen të bindur se përplasja e automjetit të drejtuar nga Ilir Muka dhe motorit me të cilin udhëtonte Aristidh Guma ka qenë aksidentale.

Ndërkohë, nuk ka ende asnjë prononcim të familjarëve të viktimës, që deri më tani kanë qëndruar të heshtur për ngjarjen e ndodhur, pavarësisht se është folur në emër të tyre. Burime pranë familjes bëjnë të ditur se nga ana e tyre po mbahet zi për djalin e familjes, teksa nga ana e prokurorisë u deklarua se marrja në pyetje e të afërmve të Gumës do të bëhet në fillim të muajit shtator, kohë në të cilën edhe institucionet shtetërore rifillojnë punën normale.

Pritet që përgjatë kësaj kohë të shoqërohen dhe merren në pyetje edhe personat e akuzuar për sulmin ndaj një grupi xhirimi të një televizioni kombëtar, ku mbeti i plagosur me thikë një operator.

Vdekja e Aristidh Gumës ndodhi më 12 gusht të këtij viti rreth orës 21:00 ku ai u përplas nga një automjet i drejtuar nga Ilir Muka, ndërsa udhëtonte me motorin e tij. Vetëm një orë më pas, aksi kombëtar në Himarë u bllokua nga disa banorë të Himarës që dolën bashkë me familjet e tyre. Aksi u mbajt i bllokuar për rreth 15 orë.

Pas ngjarjes së ndodhur reaguan kreu i bashkisë Himarë e njëkohësisht kreu i Omonias Vasil Bollano, si dhe kreu i PBDNJ-së Vangjel Dule, të cilët e konsideruan ngjarjen si vrasje me paramendim, duke u shprehur se ishte vrarë një minoritar grek për arsye se kishte folur greqisht. Nga ana tjetër, reagoi edhe Ministria e Jashtme greke e cila deklaroi se “është vrarë një emigrant grek në Himarë me prejardhje amerikane”.

Çështja kaloi kufijtë kombëtarë, ndërkohë që qarqe të caktuara greke vendosën t’i drejtohen edhe Brukselit, teksa Dule e Bollano kërkuan hetues, policë e gazetarë grekë për çështjen.

Përpara togave të zeza, tetë djemtë e cilësuan ngjarjen si aksident, duke u shprehur se kishin qenë duke ecur me shpejtësi drejt Vlorës dhe se përplasja me viktimën 36-vjeçare kishte ndodhur në një kthesë.

Gjatë një vizite në Shqipëri, Presidenti i Rumanisë, Trajan Basesku tha se minoritetit arumun duhet ti jepet statusi i një minoriteti kombëtar. “Ata janë shtetas të besuar të shtetit shqiptar të cilët kanë treguar se e meritojnë këtë vlerësim”, tha Basesku gjatë konferencës së përbashkët për shtyp me Presidentin Bamir Topi.

Presidenti rumun ka përsëritur qëndrimin e shtetit të tij se nuk do të njohë pavarësinë e Kosovës dhe kjo jo se Rumania nuk respekton kosovarët por nga respekti për të drejtën ndërkombëtare.

Me ftesë të Presidentit Bamir Topi vizitoi sot Shqiperinë Presidenti i Rumanisë, Trajan Basesku. Presidenti dhe delegacioni zyrtar që e shoqëron u priten me një ceremoni solemne në Pallatin e Brigadave nga Presidenti i Republikës, Prof. Dr. Bamir Topi. Gjithashtu u nënshkrua “Memorandumi i Mirëkuptimit në fushën e Komunikacionit dhe Informacionit të Teknologjisë”, si dhe “Protokolli i Bashkëpunimit midis Porteve”.

Gjatë qëndrimit të tij në Shqipëri, Presidenti rumun do të takohet dhe me Kryetarin e Këshillit të Ministrave të Shqipërisë, Sali Berisha dhe Kryetaren e Kuvendit të Shqipërisë, Jozefina Topalli. Në tjetër takim, ai me komunitetin arumun që jeton në vendin tonë, do të përmbyllë vizitën zyrtare njëditore të Presidenti rumun Basesku në Shqipëri.

http://www.shekulli.com.al/2010/06/08/presidenti-rumun-basesku-viziton-sot-vendin-tone.html

Gjykata e Selanikut në Greqi ka vendosur që Liljana Kondakçi të ekstradohet në Itali, pas arrestimit të saj rreth dy muaj më parë në shtetin grek. Vendimi mësohet se është marrë të martën në mbrëmje, duke i dhënë mundësi autoriteteve të drejtësisë greke që të ekstradojnë në Itali, këngëtaren e njohur shqiptare. Liljana Kondakçiu, e cila po hetohet në këtë shtet për trafik ndërkombëtar të lëndëve narkotike pritet që gjatë ditës së shtunë të dërgohet Kalabri.

Kondakçiu u arrestua për herë të dytë, jashtë territorit shqiptar për llogari të autoriteteve italiane, e dyshuar si e përfshirë në një rrjet të trafikut të drogës. Kjo e fundit u ndalua nga autoritet policore të qytetit të Selanikut,në fillim të muajit prill të këtij viti pas urdhër arrestit ndërkombëtar lëshuar ndaj saj. Sipas të dhënave që janë bërë të ditur në imediat italiane, Liljana Kondakçi, 58 vjeçe, u arrestua pasi ndaj saj ishte lëshuar një urdhër ndalimi ndërkombëtar i autoriteteve të drejtësisë italiane, për akuzën e trafikut të lëndëve narkotike në bashkëpunim me një grup personash të tjerë.

Mësohet se shpallja në kërkim e këngëtares shqiptare ka ardhur pas hetimeve të policisë italiane, ku dyshohet se kjo e fundit ishte e implikuar me të arrestuarit e tjerë në këtë trafik. Nga pjesa tjetër e grupit, Kondakçi ishte identifikuar me nofkën “Mama”. Ajo u akuzua si e përfshirë në trafik, pas një operacioni antidrogë të zhvilluar në Kalabri ku u arrestuan rreth 20 persona. Këngëtarja 58- vjeçare e cila u bë e njohur në vitet 80-të në Shqipëri, u arrestua në një banesë private në Selanik, pasi kohët e fundit ishte larguar nga Shqipëria për të jetuar në shtetin fqinj, në Greqi. Pasi autoritetet italiane kishin lëshuar urdhrin ndërkombëtar të arrestit, këngëtarja ishte larguar nga Italia, duke ardhur në vendlindje.

Por gjatë kohës së qëndrimit në Shqipëri, Kondakçi , u shpreh në media se nuk kishte asnjë problem me drejtësinë italiane dhe mund të lëvizte e lirë në çdo vend. Liljana Kondakçi është arrestuar fillimisht në maj të vitit 2006, ku nga të dhënat e raportuara në mediat e shtetit fqinj, në Itali, kjo e fundit u arrestua në stacionin e trenit Sibari në Cosentino, me tre kilogram kokainë në çantë. Por gjatë arrestimit, ajo kishte deklaruar se pakoja me drogë ishte një dhuratë nga një fans dhe ajo nuk ishte në dijeni për përmbajtjen e saj, duke hedhur poshtë edhe akuzat se ishte e përfshirë në rrjetin e trafikut të drogës. Prokuroria e Castrovillari kërkoi dënimin me 2 vjet e 8 muaj burg për artisten shqiptare dhe personin që priste drogën, i cili rezultoi se ishte një shqiptar. Pas publikimit të lajmit se ishte person në kërkim nga autoritetet italiane, këngëtarja lirike e viteve ’80 Liliana Kondakçi, mohoi akuzat e ngritura ndaj saj, duke hedhur poshtë pretendimet e policisë italiane se ajo ishte e përfshirë në një organizatë të trafikut të drogës.

http://www.shekulli.com.al/2010/06/05/gjykata-greke-vendos-ekstradim-ne-itali-per-kengetaren-liljana-kondakci.html

Lideri socialist Edi Rama reagoi sërish për ndërhyrjen e policisë në protestat nëpër rrethe, duke treguar shfaqjen e shëmtuar të një pushteti, që sipas tij, e ka humbur toruan dhe largpamësinë.

“Ne jemi të vendosur, të bindur dhe të palëkundur në qëndrimin tonë, sepse kërkojmë atë që nuk ka lidhje me luftën për pushtet, por bëhet fjalë për një çështje që është në interesin publik, për ta çliruar vendin nga një sistem i mbyllur dhe jo transparent”, u shpreh Rama, teksa vizitonte grevistët e shtruar në QSUT.

Ka degjeneruar në dhunë protesta e sotme në Përmet. Ashtu si edhe dje në Tepelenë dhe Korçë policia ka rrahur protestuesit që tentuan të bllokojnë rrugën, në shenje sensibilizimi me grevistët.

Ndërsa në mengjes, policia ka arrestuar katër persona në Tepelenë, nën akuzat e mosbindjes ndaj policisë dhe bllokimit të transportit publik, ndërsa katër të tjerë janë shpallur në kërkim. Te arrestuar janë shtetasit, Luan Gërdi, Përparim Hodo, Astrit Pasha dhe Novruz Shehu. Një ditë më parë policia e Tepelenës shoqëroi 10 persona në komisariat gjatë protestës së qytetarëve në sheshin Ali Pasha. Protestuesit tentuan të bllokojnë aksin Tepelenë-Gjirokastër për 10 min në shenjë sensibilizimi me grevistët e Tiranës, por u ndaluan me dhunë nga policia. Për katër nga të shoqëruarit policia preu sot në mëngjes fletë-arrestet.

11 maj

Dhunë dhe gaz lotsjellës në protestën e socialistëve të juglindjes në aksin Korçë-Pogradec. Disa protestues janë lënduar, ndërsa nuk i ka shpëtuar shkopinjve të gomës dhe deputeti i Korçës, Pandeli Majko.

Anëtarët e PS dhe mbështetësit e saj sot nën drejtimin e deputetëve Pandeli Majko, Mimi Kodheli dhe Alfred Dalipi synuan të organizojnë një protestë në fshatin Çërravë në aksin nacional Korçë-Pogradec. Forca të shumta të policisë së Drejtorisë së Policisë në Korçë me pretendimin se protesta ishte e jashtëligjshme kanë ndërhyrë me forcë duke përdorur fillimisht shkopinjtë e gomës si dhe më pas kanë vënë në përdorim edhe gaz lotsjellës.

Protesta është kthyer në një përleshje të dhunshme dhe në mesin e protestuesve ka pasur edhe disa qytetarë të plagosur. Disa prej tyre janë nisur me urgjencë në spitalin e qytetit të Korçës për shkak të problemeve të shkaktuara nga gazi lotsjellës nga uniformat blu por dhe dëmtimeve që kanë marrë nga dhuna e ushtruar mbi ta. Forcat e policë në vendin e protestës kanë qenë të shumtë në numër, ndërkohë që ata nuk kanë lejuar që përfaqësuesit e majtë të nisnin tubimin e tyre paqësor në mbështetje të 200 grevistëve të urisë në bulevardin kryesor të kryeqytetit.

Mes protestuesve ka hyrë për të qetësuar situatën në raport me veprimet e policisë deputeti Majko, por për më shumë se 30 minuta dhuna ka vazhduar pa ndërprerje.

Padia
Pas kësaj ngjarje të rëndë tre deputetët socialistë Majko, Kodheli dhe Dalipi kanë depozituar padi pranë Prokurorisë së Korçës ndaj forcave të policisë dhe ndaj Drejtorit të Policisë së Korçës Bernard Çaushaj. Ky i fundit ka organizuar operacionin e dhunës ndaj deputetëve të majtë si dhe një grupi protestuesish të sulmuar edhe me gaz lotësjellës. Në një prononcim për gazetën deputeti Majko është shprehur se objekt i dhunës ka qenë edhe vetë ai. Policia e Korçës ka pohuar Pandeli Majko ka kryer një akt të dhunshëm dhe të turpshëm, për të detyruar opozitën të tërhiqet nga protesta e saj paqësore.

Gjithsesi pritet që gjithçka të zbardhet nga një hetim i posaçëm, ndërkohë që drejtori i policisë juglindore Çaushaj ka mohuar përdorimin e dhunës nga forcat e policisë, që sipas tij vepruan vetëm për të shpërndarë protestuesit që po krijonin konfuzion në një nga arteriet kryesore të Korçës.

Protestues të Partisë Socialiste kanë bllokuar për disa minuta akse të rëndësishme rrugore në Korçë, Vlorë dhe Tepelenë. Policia ka tentuar të pengojë këto protesta ç’ka ka çuar edhe në përleshje mes protestuesve dhe policisë. Këtë e konfirmon të paktën për Korçën edhe deputeti Pandeli Majko. Ai tha se policia ka dhunuar qytetarët dhe madje edhe deputetët, ndërsa ka hedhur gaz lotsjellës për të shpërndarë protestuesit. Sipas tij, gjithçka ka qenë paqësore edhe protestat pakminutëshe kanë për qëllim sensibilizimin e qytetarëve për grevistët në Tiranë.

*****

ora 11:00

Pesë persona në Durrës janë shpallur në kërkim sot nga policia. Ata janë protestues të Partisë Socialiste që një ditë më parë bllokuan autostradën Tiranë-Durrës. Policia njofton se 5 nga protestuesit e PS-se të cilët bllokuan dje për gati 45 minuta autostradën Tiranë-Durrës, iu është firmosur urdhër-arresti. Sipas policisë ndaj tyre rëndon akuza e bllokimit të trafikut rrugor. Të shpallur në kërkim janë Llazar Mazniku, Ilir Ngresi, Hekuran Shehu, Altin Baku dhe Ismail Isaku.

****

zhvillimet e dt. 11 Maj

Policia ka nisur shoqërimet në komisariat për organizuesit e protestave të sotme në rrethe të ndryshme të vendit, që kulmuan me bllokimin e akseve kryesore.

Kreu i Konfederatës së Industrisë së Vlorës, Kujtim Myrto, së bashku me Sekretarin e PSD-së së Vlorës, Festim Cobon janë arrestuar sot, si pjesëmarrës në protestën e organizuar nga Partia Socialiste.

Sipas policisë së Vlorës shoqërimi i këtyre dy personave është bërë pasi kanë bllokuar rrugën.

Ne mbremje, burime prane PS-se, bejne me dije se Pashuk Nika, i plotfuqishmi i lagjes 16 dhe Muharrem Haka, i plotfuqishmi i lagjes 16 kërcënojnë të rinjtë e FRESH-it Durrës pas pjesëmarrjes sot në protestë.

“Këta dy punonjës të policisë Durrës kanë trokitur në dyert e shtëpive të të rinjve, duke kërkuar të paraqiten në komisariat dhe duke iu bërë të qartë familjarëve se të rinjtë mund të përfundojnë pas hekurave”- thuhet ne deklaraten per mediat, ku shtohet se “FRESH Durrës i bën apel policisë së shtetit të respektojë ligjin dhe figurën jo politike të uniformës blu”.

Protestat e socialistëve janë shtrirë sot në të gjithë vendin, shoqëruar me bllokimin e akseve kryesore ne shume qytete.

Bllokimi i rrugëve ka ardhur në shenjë solidarizimi dhe mbështetje për grevën e urisë së deputeteve të PS dhe mbështetësve të tyre, prej 11 ditësh në çadrat para kryeministrisë.

Pas protestave ka reaguar policia e Shtetit, e cila ka deklaruar se pengimi i qarkullimit të mjeteve të transportit” përbën vepër penale dhe sipas nenit 293 të Kodit Penal dënohet me gjobë ose me burgim gjer në 3 vjet.

“Nga strukturat e Policisë së Shtetit po punohet për identifikimin dhe shoqërimin e organizatorëve të këtyre veprimeve të paligjshme në të gjitha qarqet e sipërcituara dhe materialet procedurale për çdo rast do t’i referohen Prokurorisë për veprën penale “pengim i qarkullimit të mjeteve të transportit”- thuhet në njoftimin e policisë.

Ja rrugët e bllokuara sot

- Në Shkodër, në Krye Bushat në aksin rrugor Shkodër-Lezhë,

- Në Tiranë, në Rrugën e Elbasanit tek Ura e Farkës,

- Në Gjirokastër, në aksin rrugor Tepelenë-Gjirokastër,

- Në Durrës, në autostradën Durrës-Tiranë, në Shkozet,

- Në Vlorë, në hyrje të qytetit të Vlorës,

- Në Fier, në rrethrrotullimin e Kolonjës, në autostradën Fier-Lushnjë,

- Në Lezhë, tek kryqëzimi i Patokut, në aksin rrugor Lezhë-Laç,

Në Berat, tek kthesa e Poshnjës, në aksin rrugor Berat-Lushnjë.

______________________

Grupi i PS: 14 Maj, dita e protestës së madhe, solidaritet kombëtar

UPDATE-Protesta e opozitës zbret sërish në rrethe. Krahas grevës së urisë që do të vijojë të qëndrojë mu përpara dritares së kryeministrit Sali Berisha, opozita do të nisë sot një valë të re protestash të kombinuara me elementë të mosbindjes civile në të gjithë vendin. Vendimi i marrë të shtunën në mbrëmje është qartësuar dje në një mbledhje të dytë të grupit parlamentar socialistë, i cili ka përcaktuar edhe strategjinë që do të ndjekë për të protestuar ditët në vijim.

Grupi kuvendor i PS-së i mbledhur vetëm pak çaste pas përfundimit të mitingut të djeshëm të zhvilluar në bulevardin kryesor të Tiranës, ka vendosur që për ditët në vijim të ketë një mënyrë të re të organizimit të revoltës së qytetarëve në protesta. Kështu, është përcaktuar që ditën e premte, kur edhe mbushen plotë dy javë nga nisja e grevës së urisë, të zhvillohet një protestë tjetër e madhe në kryeqytet. Nga burime brenda grupit mësohet se ajo do të synohet të jetë më e madhe edhe se ajo e 30 prillit, ku sipas opozitës tubuan rreth 200 mijë vetë. Ndërkohë që, gjatë ditëve të tjera, pra duke filluar që nga sot e deri të enjten në Tiranë do t’i kushtohet rëndësi vetëm çadrave të grevës së urisë, ku socialistë dhe përkrahës të tjerë të Tiranës do të mbështesin moralisht grevistët e urisë. Barra kryesore tashmë i mbetet pikërisht qarqeve të tjera, të cilat sot duhet të nisin mosbindjen civile ndaj institucioneve dhe ligjeve të vendit. Mësohet se të gjithë deputetët e qarqeve të tjera do të shpërndahen nëpër zonat e tyre zgjedhore dhe sëbashku me degët e PS-së do të organizojnë çdo ditë në orën 10.00 të paradites protesta lokale të cilat do të kthehen edhe në një përpjekje për të paralizuar qarkullimin dhe funksionimin e institucioneve në lokalitetet e tyre përkatëse.

Ndërkohë i gjithë ky aksion në rrethe do të menaxhohet nga kryetari i grupit parlamentar i PS-së, Gramoz Ruçi, i cili do të përcaktojë axhendën dhe oraret e protestave. Ndërsa kreu socialistë Edi Rama mësohet se do të kujdeset më shumë për situatën në Tiranë ku natyrisht priten që të nisin edhe negociatat për gjetjen e zgjidhjes. Me këtë strategji, PS-ja kërkon ti bëjë presion qeverisë edhe nga rrethet për ta detyruar këtë të fundit që të pranojë kërkesat. Natyrisht lënia e një afati deri të premten e ardhshme për të zhvilluar protestën tjetër masive duket se është një sinjal i qartë prej socialistëve drejtuar mazhorancës se zgjidhjen finale e presin deri të enjten.

GJIROKASTËR- Krijohen grupet e përbashkëta për monitorimin e territorit të qarkut në lidhje me zonat ku mund të kultivohet bimë narkotike. Sipas zëvendësdrejtorit të policisë së Gjirokastrës, Adriatik Tafçiu, policia është e vendosur në luftën pa kompromis kundër narkotikëve.

“Policia do të ndërhyjë në çdo cep të qarkut përfshi këtu edhe Lazaratin, ku edhe në këtë komunë po bëhet një punë e mirë për të parandaluar kultivimin e bimëve narkotike dhe do vijojmë deri në eleminimin e plotë të fenomenit kanabis edhe në këtë zonë”- ka thënë ai, gjatë një takimi sensibilizues në Kurvelesh të Tepelenës.

Ai ka theksuar se policia do të përdorë të gjitha metodat bashkëkohore për të evidentuar parcelat që mund të kultivohen nga banorë të ndryshëm në çdo fshat a komunë.

“Do të përdoren filmimet që do të realizohen nga sateliti, që tashmë Policia e Shtetit e ka marrë me qira për të çuar para drejtësisë, të gjithë ata që do të kultivojnë bimë narkotike
Do të monitorohet i gjithë territori i thyer dhe malor nga helikopterët e policisë, si dhe do të shkelet çdo cep i qarkut nga grupet e përbashkëta polici -pushtet vendor dhe banorë të çdo fshati, të cilat tashmë janë ngritur dhe funksionojnë në çdo komunë.”- tha ai.

_____________________

Braun: Konfiskimet janë rritur, por trafiku i drogës mbetet ende shqetësues

INTERVISTA/ Majkëll Braun, ish shef i operacioneve në Agjencinë Amerikane kundër Trafikut të Drogës dhe ekspert i anti-trafikimit flet per situaten ne Shqiperi dhe Ballkan. Raporti i Departamentit të Shtetit mbi Trafikun Ndërkombëtar të Drogës thotë se Shqipëria dhe Kosova shërbejnë si vende tranzite të trafikut të drogës që vjen nga Afganistani për në Evropën Perëndimore. Majkëll Braun thotë se megjithëse vendet e Ballkanit kanë rritur numrin e konfsikimeve, grupet e krimit të organizuar përsëri arrijnë të gjejnë rrugë të tjera. Zoti Braun thotë se kjo ndodh jo vetëm nga shkathtësia dhe fuqia e këtyre grupeve, por edhe për shkak të mjeteve të kufizuara në dispozicion të forcave të rendit, ushtrisë dhe shërbimeve të zbulimit që e luftojnë këtë trafik në vendet e Ballkanit.

Zoti Braun, Shqipëria dhe Kosova shihen si vende tranzite të heroinës afgane të destinuar për vendet e Evropës Perëndimore. Që nga fillimi i këtij problemi, cila ka qenë prirja, a është shtuar apo ka rënë sasia e drogës që kalon në këto vende gjatë viteve?

Është e vështirë të thuhet sepse ka disa vende përmes të cilave kalon droga në Ballkan, dhe kjo rrugë ndryshon vazhdimisht. Arsyeja e ndryshimit është se ndërsa polica, ushtria dhe shërbimet e zbulimit bëhen më efikase, dhe fillojnë të kapin drogën në një zonë, grupet e fuqishme të krimit të organizuar kanë aftësinë të ndryshojnë rrugë shumë shpejt. Për mendimin tim, nuk ka model organizativ më elastik sesa grupet e fuqishme të krimit të organizuar. Pra, sapo siguria rritet në një zonë, ato kalojnë shpejt në një zonë tjetër. Ato janë gjithnjë në kërkim të atyre, që unë i quaj “pika të dobëta” përmes të cilave mund të kalojnë sasi më të mëdha të produkteve të tyre dhe t’i nxjerrin në treg. Sa herë që kapen sasi lëndësh narkotike, atyre u preken të ardhurat, dhe si çdo biznes tjetër, kjo është pika ku atyre u dhemb më shumë.

Pra ju thoni këto grupe reagojnë shumë shpejt? Por a është e mundur që konfiskimet të jenë shtuar, por edhe sasia e drogës së trafikuar të jetë shtuar gjithashtu?
Është e natyrshme që kur rritet kërkesa nga njëra palë, pala tjetër rrit numrin e dërgesave. Pra, meqenëse kërkesa rritet në Evropë, besoj se kjo ka qenë një ndër arsyet pse ne kemi parë një farë shtimi të trafikut të drogës afgane që kalon përmes rrugës Ballkanike.

Sa efikase kanë qenë qeveritë e Shqipërisë dhe Kosovës në operacionet e tyre kundër trafikut të lëndëve narkotike? A kanë reaguar në masën e duhur?
Mendoj se ato po bëjnë një punë të mirë, por përpjekjet duhet të vazhdojnë gjithmonë. Duke marrë parasysh mjetet që kanë në dispozicion, ato po punojnë mirë. Policia, ushtria dhe institucionet e sigurisë mund të veprojnë deri në një farë mase. Unë sapo e thashë se këto grupe të fuqishme që trafikojnë sasi të mëdha droge janë shumë elastike dhe të shkathëta. Dhe për sa kohë që policia, ushtria dhe shërbimet e zbulimit nuk kanë mjetet ajrore, detare apo tokësore për ta dërguar policinë në vendin e duhur në kohën e duhur, atëherë ata do të hasin në vështirësi.

Lufta kundër trafikimit të drogës kërkon përpjekje ndërkombëtare. Çfarë ndihme i ka dhënë Agjencia amerikane Kundër Trafikut të Drogës qeverisë së Shqipërisë dhe Kosovës në luftën kundër këtij trafiku?
Agjencia amerikane Kundër Trafikut të Drogës ka praninë më të madhe të forcave të rendit jashtë vendit, janë rreth 90 punonjës deri tani. Kjo agjenci nuk bashkëpunon vetëm me një apo dy vende në rajonin e Ballkanit, ajo shërben si një urë lidhëse mes shumë vendeve për të lehtësuar ndarjen e informacioneve të rëndësishme të zbulimit, për të bashkërenduar hetimet, në mënyrë që hetimet të kenë rezultate maksimale, pra të japin grushtin më të fortë në kohën e duhur për t’i shkatërruar apo të paktën për t’i dëmtuar rëndë këto organizata. Pra ky është një rol i rëndësishëm që luan Agjencia amerikane Kundër Trafikut të Drogës. Megjithatë, duhet thënë se vendet që bashkëpunojnë me këtë Agjenci luajnë një rol po aq të rëndësishëm sa ajo. Gjithçka është e ndërlidhur, dhe ky nuk është një kërcënim sigurie që mund zgjidhet nga një, dy apo tre vende. Ky është një kërcënim global, prandaj duhet një përpjekje globale për ta luftuar atë.

Të gjitha këto vende të Ballkanit po përpiqen të integrohen në Bashkimin Evropian. Si do të ndikojë kjo tek shkëmbimi i informacionit, rritja e kapaciteteve dhe kualifikimi i forcave në vendet e Ballkanit nga ekspertë perëndimorë?
Nuk jam i sigurt nëse jam personi i duhur për t’iu përgjigjur kësaj pyetjeje. Unë kam njohuri për Europolin, e cila është një organizatë e relativisht e re. Megjithatë, mund të them se nëse këto vende bëhen anëtare të Bashkimit Evropian, kjo mund t’u krijojë mundësi të reja dhe mund t’u japë mënyra të tjera për shkëmbimin e informacioneve shumë të rëndësishme të zbulimit dhe sidomos të provave. Sepse në fund të fundit janë provat ato që i duhen paraqitur gjykatave kompetente nëpër botë në mënyrë që bosët e drogës të mund të futen në burg dhe të qëndrojnë pas hekurave ku edhe u takon të jenë.

Trafiku i drogës sjell me vete krimin e organizuar, pastrimin e parave dhe korrpusionin. Po terrorizmin? A ka sjellë ky trafik me vete terroristë në zona si Shqipëria, Kosova dhe Ballkani në përgjithësi? Dhe si do të ndikojë kjo tek siguria e rajonit?
Siç e lashë të kuptohet edhe më parë, ndërkohë që shohim tranzicionin e vazhdueshëm të Talebanit dhe al-Kaidës nga grupe që drejtohen vetëm nga ideologjia, në grupe që drejtohen nga dollari apo Euroja, pra motivi ndryshon nga ideologjia tek fitimi, ky lloj skenari i sjell grupet në kontakte më të ngushta me grupe indigjene të krimit të organizuar që e kanë bazën në disa prej vendeve ballkanike. Pikërisht kjo më duket shqetësuese. Bashkëpunimi i tyre bëhet më i ngushtë në mënyrë krejt të natyrshme. Po t’i hedhim një vështrim shifrave të OKB-së, dhe të shohim katër kategoritë më të rëndësishme të tregëtisë së paligjshme në botë, ato radhiten në këtë mënyrë: droga sjell rreth 322 miliard dollarë në vit të ardhura nga kontrabanda, pas saj renditet trafikimi i qenieve njerësore me 32 miliard dollarë, tregëtia globale e armëve është e treta me 10 miliard dollarë dhe tregëtia e diamantëve ka të ardhura rreth një miliard dollarë. Ideja është që nuk ka asnjë lloj tregëtie të paligjshme në botë që sjell të ardhurat që sjell tregëtia e paligjshme e trafikut të drogës. Prandaj, kjo jo vetëm që i tërheq shumë grupet e krimit të organizuar në të gjithë botën, por po bëhet gjithnjë e më tërheqëse edhe për organizatat terroriste. Ndërkohë që komuniteti global vazhdon përpjekjet në luftën kundër organizatave të fuqishme terroriste, ne kemi ndërprerë rrjedhën e parave që ata merrnin nga donatorë privatë dhe kemi ulur numrin e vendeve që mund të mbështesin hapur grupet terroriste. Për këto dy arsye, gjithnjë e më shumë grupe terroriste po përpiqen të gjejnë mënyra për t’i mbajtur gjallë aktivitetet e tyre. Prandaj, ata po kalojnë natyrshëm drejt tregëtisë së drogës, dhe sa më shumë të ndodhë kjo, aq më elastikë, aq më të shkathët dhe aq më mobile bëhen ata si dhe aq më të forta bëhen aleancat që fillojnë të krijojnë me grupe të fuqishme të krimit të organizuar, dhe kjo është shqetësuese për mendimin tim. Gjëja më e rrezikshme është ajo që unë e quaj organizata terroriste hibride. Një grup që nga njëra anë funksionon si organizatë terroriste, por nga ana tjetër është edhe organizatë e trafikut global të drogës.

_______________________

Kreu i Policisë së Shtetit: Lazarati, s’mund të na mbajë peng vizat

GJIROKASTER- Drejtori i Policisë së Shtetit, Hysni Burgaj ka kërkuar nga Gjirokastra vazhdimin me vendosmeri te luftes kunder trafikut te drogës.

Deklarata është bërë sot gjatë analizës 3 mujore, në drejtorinë e policisë së këtij qarku, ku Burgaj me tone të ashpra ka folur për zbatimin e Planit të Veprimit për Parandalimin e Kultivimit të Bimëve Narkotike.

“Lazarati, apo ndonjë komunë e fshat tjetër në çdo cep të Shqipërisë nuk do të mund të mbajnë peng vednin për liberalizimin e vizave”- tha ai, duke kërkuar nga drejtuesit evidentimin e parcelave ku mund të kultivohen, që më pas të shihet mundësia e ndërhyrjes urgjente.

Vetem se fundi policia ne disa operacione ka bllokuar qindra kg droge qe vinte nga Lazarati dhe kishte destinacion vendet fqinje, Greqine dhe Italine.

_____________

Droga, Berisha: Ndëshkim zyrtarëve në komuna

TIRANË- Kryeministri, Sali Berisha ka pranuar se në vend vazhdon kultivimi i drogës dhe ka kërkuar masa të ashpra ndëshkimore për zyrtarët në fshatra e komuna që nuk denoncojnë.

Gjatë fjalës së tij në konferencën kombëtare për parandalimin e kultivimit të Kanabisit, Berisha, duke njohur përparimin e bërë në këtë drejtim ka thënë se kultivimi vazhdon të mbetet ende problem.

“Në disa zona, plantacionet janë mjaft të dukshme”- ka theksuar Berisha, duke shtuar se kultivimi ndodh në dritën e diellit. Ai i ka bërë apel policisë të bëjnë punën e tyre. Ai kërkoi gjithashtu të zbatohet ligji për kryetarët e komunave apo për zyrtarët e tjerë në fshatrat ku ende vazhdon të kultivohet kanabis. Duke theksuar se ka shumë pak raste denoncimi dhe ndjekje penale.

Nga ana e tij, ministri i Brendshëm, Lulzim Basha ka premtuar se për herë të parë Policia e Shtetit do ketë në dispozicion mjetet më të sofistikuara për të luftuar kultivimin e bimëve narkotike, siç është vëzhgimi satelitor.

__________________

Raporti i DASH: Shqipëria, vend tranzit për trafikantët e drogave
Shqipëria shërben si vend tranzit për trafikantët e drogave që transportojnë heroinën e prodhuar në Afganistan, nga Azia Qendrore për në destinacione të ndryshme në Evropën Perëndimore.
Ky është përfundimi i raportit të Departamentit amerikan të Shtetit, për strategjinë ndërkombëtare kundër drogave, publikuar sot.

Në vitin 2009, në Shqipëri u shtua sasia e heroinës së kapur, ndërsa ka rënë sasia e mariuhanës së kapur. Në përgjigje të trysnisë ndërkombëtare, thuhet në raportin e Departamentit të Shtetit, qeveria e Shqipërisë, u është kundërvënë me agresivitet elementëve kriminale, ndonëse përpjekjet e saj pengohen nga mungesa e burimeve dhe ekspertizës si dhe nga korrupsioni i lartë.

Dalja në Adriatik, si dhe kufijtë tokësorë jo të ruajtur mirë, e bëjnë këtë vend një ndalesë tërheqëse për trafikantët që fusin droga në Evropën Perëndimore, pjesërisht edhe si rezultat i mungesës së fondeve për të financuar përpjekjet anti-drogë dhe korrupsionit të përhapur mes zyrtarëve të rendit.

Ndërsa historikisht shumica e drogave kalonin përmes Detit Adriatik, politikat më agresive të qeverisë shqiptare, si dhe patrullimi më i mirë i bregdetit, kanë bërë që trafikantët t’i zhvendosin rrugë-kalimet drejt kufijve tokësore me Kosovën dhe Malin e Zi, duke përdorur Serbinë dhe Bosnjen si pika tranziti. Moratoriumi i qeverisë shqiptare ndaj anijeve të shpejta ka bërë që të ngadalësohet lëvizja e drogave dhe trafiku i njerëzve drejt Italisë.

Në janar të vitit 2009, firma Lokheed Martin përfundoi instalimin e një sistemi radarësh për mbikqyrjen e detit, gjë që u jep autoriteteve shqiptare të dhëna në kohë reale se çfarë mjetesh lundruese ndodhen në ujërat detare të vendit.

Policia shqiptare, thuhet më tej në raportin e Departamentit të Shtetit, vazhdon të kapë sasi më të mëdha heroine nga viti në vit. Sipas të dhënave nga Italia, sasia e drogës afgane e kapur në Itali, që ka shkuar aty drejtpërdrejtë nga Shqipëria, mbetet në kuota të ulëta. Korrupsioni, thuhet më tej në raport, vazhdon të mbetet një problem madhor për Shqipërinë.

Pagat e ulëta, një shoqëri që e pranon gjerësisht ryshfetin, lidhjet e ngushta shoqërore, e bëjnë të vështirë luftën kundër korrupsionit në radhët e policëve, gjykatësve dhe zyrtarëve të doganave. Megjithëse rastet e zyrtarëve të akuzuar për korrupsion janë shtuar, Shqipëria vazhdon të vuajë për shkak të mungesës së pavarësisë e gjyqësorit, nga mungesa e transparencës së procedurave ligjore dhe shumë raste nuk zgjidhen kurrë.

Hetimet e rasteve të korrupsionit pengohen nga imuniteti që gëzojnë zyrtarë të lartë të qeverisë, gjykatës dhe anëtarë të parlamentit. Trafikimi i drogave vazhdon të përbëjë një nga profesionet e paligjshme më fitimprurëse në Shqipëri. Ministria e Shëndetësisë, thuhet në raport, njofton se përdorimi i drogave në vend ka ardhur në rritje. Sipas ministrisë, në Shqipëri ka rreth 30 mijë përdorues drogash, por të dhënat mbi të cilat bazohet kjo shifër, nuk janë shumë të besueshme.

Qeveria e Shqipërisë, shkruan raporti i Departamentit të Shtetit, ka marrë masa kundër përdorimit të drogës, por përsëri përpjekjet e saj pengohen nga infrastruktura e pamjaftueshme shëndetësore për t’u marrë me trajtimin e përdoruesve të drogave.

Pas publikimit të Raportit të Departamentit Amerikan të Shtetit që nënvizonte shtim të rastit të korrupsionit mes zyrtarëve, Partia Socialiste ka deklaruar se hetimet pengohen nga njerëz me imunitet.

“Hetimet për korrupsion pengohen nga imuniteti që gëzojnë zyrtarë të lartë të qeverisë. Tashmë këtë nuk e thotë vetëm Partia Socialiste, por e thotë edhe Departamenti Amerikan i Shtetit, edhe Bashkimi Evropian, edhe Këshilli i Europës edhe Transparency International, dhe çdo partner tjetër ndërkombëtar që vlerëson Shqipërinë për çështje të korrupsionit”- ka thene Tahiri.

Sipas tij, kryeministri ynë, kampion për korrupsion familjar e qeveritar, ka arritur me sukses ta kthejë Shqipërinë, për turpin e të gjithëve, në kampion të korrupsionit, duke lënë pas të gjithë vendet e Evropës dhe shumicën e botës së qytetëruar.

Nga Shekulli Online

KORCE – Pas shkarkimit të kreut të Omonia-s, Spiro Lici me dhjetëra qytetarë kanë bërë denoncime në polici për mashtrim me vizat. Ata kanë dëshmuar se Lici iu merrte para për t’iu nxjerrë vizë dhe kur nuk arrinte t’ua siguronte vizat nuk ua kthente mbrapsht shumat e përfituara.

Kryetari në detyrë i degës së Omonias në Korçë, Naum Disho tha se “kanë ardhur ankesa të shumta nga qytetarët të cilët janë mashtruar nga Lic”i. Ndaj i ka drejtuar ata në polici, pasi shoqata s’mund ti dëmshpërblente. Një grup hetimor është ngritur për të zbardhur ngjarjen.

Sipas drejtuesve të Omonia-s sitauata u zbulua pas një sinjali të ardhur nga Konsulli Grek në Korçë Theodor Ikonomou i cili për më tepër ka nënshkruar një letër të hapur për forumet e tjera të kësaj organizate ku i vinte në dijeni lidhur me kërkesat e panumërta që vinin nga ish kryetari i shkarkuar për paisjen me viza të dhjetra qytetarëve, të cilët për më tepër nuk kanë qënë antarë të Omonia-s.

Madje konsulli grek mësohet të jetë shprehur ndër të tjera në këtë letër se në listat që vinin me firmën e Licit gjenin vend dhe persona të inkriminuar të shpallur në kërkim.

Pas kësaj letre kanë reaguar me urgjencë një pjesë e antarësisë së Omonia-s të cilët kanë votuar dje shkarkimin pa kushte të Licit si dhe drejtimin e përkohshëm të saj deri në zgjedhjet e tjera nga Naum Disho. Disho kërkoi sot ndihmën e policisë e cila ka marë të gjitha dëshmitë e qytetarëve për marrëdhënien e tyre me Licin dhe pagesat që kanë kryer për tu paisur me vizë nga Konsullata greke nën siglën e Omonia-s. http://www.shekulli.com.al/2010/03/23/mashtrimi-me-vizat-greke-policia-heton-skandalin-e-ominia-s.html

TIRANË – Shqipëria brenda pesë vjetësh pritet të bëhet një fuqi energjie. Kësaj radhe këtë gjë nuk e thotë Kryeministri Berisha por Qeveria italiane. Në një dokument zyrtar që ajo i ka dorëzuar Bashkimit Europain thuhet se brenda 5 viteve të ardhshme, Italia parashikon të importojë nga Shqipëria afro tre miliardë kilovat orë energji në vit.

Dokumenti, është përgjigje e kërkesave të BE-së për energjinë e rinovueshme. Në prill të vitit të kaluar, Parlamenti Europian dhe Këshilli i Europes vendosen që brenda vitit 2020, më shumë se 20 per qind e energjisë që konsumohet në Bashkimin Europian të prodhohet nga burime të rinovueshme, të cilat nuk shkaktojnë ndotje mjedisore, duke caktuar edhe kuotat për secilin shtet.

Disa shtete të BE-së kanë nisur me realizimin e këtij plani, ndërsa disa të tjera si Italia, ende jo. Ndaj shteti fqinj, informon BE-në mbi hapat që është duke bërë për energjinë, dhe në këtë dokument përmendet edhe Shqipëria si vend nga do të importohet energjia.

Sasia e energjisë që Italia planifikon të prodhojë në Shqipëri është jashtëzakonisht e lartë. Për këtë pritet që të nisin nga zbatimi marrëveshjet e Berluskonit me Berishën në Tiranë vitin që kaloi për ngritjen e parkut të erës në zonën e Vlorës centralit me biomasë në Lezhe apo dhe disa projekte te tjera HEC-esh. Shqipëria përfiton nga këto projekte hapjen e vendeve të punës dhe rritje të të ardhurave në buxhetin e shtetit nga taksat që do derdhin firmat energjetike italiane. Ndërkohë, mjaft analistë kundërshtojn ngritjen e këtyre parqeve në vendin tonë për shkak të shkatërrimit të ambientit.

______________

Italia e paqartë për centralin atomik

Italia ka shprehur interesin e saj për një central atomik në Shqipëri, por ende nuk ka ide të qartë nëse do të ngrihet në vendin tonë apo jo. Ministri i Jashtëm Franko Fratini, gjatë konferencës “Skenaret e zhvillimit të rajonit përreth Adriatikut dhe Ballkanit”, duke iu përgjigjur interesit të mediave ka thënë se ende nuk është saktësuar gjë, por sipas tij Italia ka hyrë në bisedime me disa partnerë, mes tyre edhe Shqipëria.
“Po, qeveria italiane është pro ndërtimit të centraleve të reja atomike në shtëpinë e saj, e kështu edhe në Shqipëri dhe Slloveni. Janë vendosur kontaktet për të konkretizuar këto hipoteza”- ka thënë Fratini, duke shtuar se po diskutohet edhe mundësia për centralin KRSKO në Slloveni.

Deklarata per central atomik ne Shqiperi u publikua edhe gjate vizites se kryeministrit Sali Berisha ne Itali dhe konferences direkte qe zhvilloi me homologun italian, Berluskoni. Nderkohe, ne prill te vit te shkuar, Fratini konfirmoi interesin e Italise per të bashkëpunuar me Shqipërinë për disa projekte strategjike për ndërtimin e centraleve bërthamore. “Ne duam të bëjmë shumë më tepër në bashkëpunimin ekonomik mes dy vendeve, përshembull në infrastrukturë dhe në bashkëpunimin për energjinë. Ne jemi shumë të interesuar për zhvillimin e energjisë bërthamore”, tha ministri Frattini. Në këtë drejtim, ai vuri në dukje se “edhe Shqipëria është e gatshme të bashkëpunojë me disa projekte strategjike, të cilat janë shumë të rëndësishme”- tha ai.

Shkoder – Policia e Shkodres ka identifikuar dhe shpallur ne kerkim autorin e vrasjes se 17 vjeçarit, Eduart Thana.

Sipas burimeve zyrtare mesohet se autor eshte 18-vjeçari A. Brahimi, i cili tashme eshte shtetas i shpallur ne kerkim.

Eduart Thana u ekzekutua ne afërsi të Trumës së Dugajve të Reja pranë rrugës muzelale dhe Fakultetit të Shkencave Shoqërore të Universitetit.

Burime policore bëjnë me dije se në komisariat u shoqëruan rreth 12 persona, dëshmitarë dhe të tjerë që mendohet se mund të kishin informacion për ngjarjen.

Eduart Thana gjeti vdekjen ndërsa është qëlluar me armë zjarri pistoletë nga një person akoma i paidentifikuar.

Sipas policisë që i referohet dëshmive të grumbulluara në vendin e ngjarjes, viktima ka qenë duke lëvizur në këmbë dhe kur ka kuptuar se po ndiqej nga një autoveturë ka vrapuar drejt disa lokaleve në anën e djathtë të rrugës.

Viktima është ngjitur në një lokal lojrash elektronike por autori ka lënë mjetin në rrugë dhe e ka ndjekur prapa duke e qëlluar disa here me pistoletë. Më pasi autori është larguar me mjetin e tij. Edhe pse është dërhuar menjëherë në spital, 17 vjeçari nuk ka mundur të mbijetojë.

http://www.shekulli.com.al/2010/03/09/shkoder-vritet-19-vjecari.html